仲有幾日就終於到12月喇！(又老一年喇PK..) 12月係約會嘅季節，如果準備好想約心儀嘅人去食飯嘅話我想share幾個貼士俾大家。
聖誕節呢啲大節唔係話你想同人過佢就會應承，趁而家月頭好好鋪定路其實都差唔多。約人食飯都係一種學問！首先你要放鬆啲先，如果你已經打好咗句/段WhatsApp但係又成個鐘都唔夠膽send出去嘅話，你就要同自己講：我只不過想約一個普通朋友去食飯啫。自己越諗得多，就越容易壞事！就算係女仔都可以主動約人食飯，但係就千祈唔好煩膠式咁係chur佢幾時得閒。假若你問完佢都無乜特別大反應就最好還原基本步累積多啲好感先再問多次。
「忙？忙都要食飯㗎 🙈🙈🙈」如果連呢句都唔知衰乜嘅話就真係抵你孤獨終老。
之後就係要決定去邊度食飯！女人好麻煩，你問佢食咩佢都一定會答你「我無所謂呀，你揀啦」而其實你又知道佢心裏面係好有所謂。建議男生淨係問女生有啲咩唔食之後自己決定就可以，而且book定枱就包保萬無一失！建議女生食飯之前問定去邊度食，咁樣就可以因應食飯嘅場合着返適當嘅衫，唔會太over或者under dress。我不朽都係啲出街會帶紙巾嘅人，如果你無呢個習慣嘅話你要信我，喺適當嘅時辰拎到紙巾出嚟會有意想不到嘅效果，科科！
飯局當日早15分鐘到呢啲基本唔使人提啦！至於點菜我多數都會比個男仔決定。如果係分開食我一定會問咗佢main course揀咩先，之後我會因應佢揀嘅價錢而揀返差唔多嘅嗰個set；如果係一齊share食，例如和牛有三個價錢我就一定會揀中間最fair嗰個。講咁耐終於開始食飯喇！食飯要注意嘅事項反而唔係好多，除非你個人係完全無餐桌禮儀，又或者你唔好嘗試去探討希拉里點解會輸同埋人應唔應該接受安樂死等等話題，餐飯都應該會順順利利嘅！重點最忌最忌：千祈唔好提及你之前嘅男女朋友同過去嘅感情史。
終於去到尾聲最緊張嘅時候喇: 埋單！我約會嘅男生多數都比較年長同成熟 (因為我自己都已經年長同成熟... 嗚😭)，所以佢地都會因為面子或者風度問題而唔需要我俾錢。先小人後君子，對於奉旨洗男人錢嘅女人我係極反感。但係經驗話比我知，當佢比信用卡嘅時候而你又夾硬塞啲cash俾佢佢點到唔肯拎，之後你好勝心作祟死要將啲cash擺喺枱嘅中間佢又死都唔肯收最後自己又要攞返你話幾核突呢！
後來我發現不妨俾喜歡你嘅人呈一下英雄照顧你俾台階佢落，喺男生比完錢之後立刻講一聲Thank you so much，然後再講：「我依家請你去食糖水呀。」又或者「不如我地再去飲嘢囉，今次我請！」一來可以延長約會時間；二來向港女say no，受人恩惠一定要還。假若佢唔得閑直落去飲嘢嘅話，我會建議：「下星期我再請番你食飯啦。」(又可以乘機食多次飯.. YEA!) 返到屋企都仍然要text多句Thanks for dinner。假若下一餐佢都仍然堅持要俾錢嘅話，我試過索性扮去廁所順便買埋張單返埋位即刻一齊走得。你亦都可以約佢去睇戲直落食飯嘅嘅時候戲飛點都自己買咗先，睇完戲去到食飯買單嗰時先再算。
其實飯局都係希望可以進一步認識大家同試探一下對方對自己嘅好感度。記住凡事順其自然，自己唔好以為食完飯就發晒老姣覺得人哋一定好㝝自己；假如飯局之後佢唔再搵你咁就move on算囉，唔需要唔開心亦唔好勉強。與此同時害怕約會心儀對象嘅人都要鼓起勇氣提出約會要求，亦唔好太早斷定對方一定會拒絕自己。每一個人都希望可以搵到包容彼此缺點一齊共渡難關嘅嗰個人，你唔問你永遠都唔知道佢會唔會去，約人食餐飯唔會死 nothing to lose。祝約會成功！
#女人像鹽
Search